المساعد الشخصي الرقمي

مشاهدة النسخة كاملة : حال الزوجين قبل وبعد الزواج


المشاكس
14-07-2006, 10:55 PM
ليه الزوجين يتغير سلوكهم بعد الزواج عن قبل الزواج ؟؟ .. سؤال حير كل الناس ومش لاقيين له إجابة .. تعالوا نشوف حال الزوجين ايه قبل وبعد الزواج ..

خلينا نبدأ بالرجل الأول ونسأل ونشوف ..

ليه فعلا الرجل بعد الزواج يتغير سلوكه تماما عن قبل الزواج ؟؟ ..

يعنى مثلا فى فترة الخطوبة تلاقى الشاب وخطيبته ماشيين هو شابك صابعه الصغير فى صابعها الصغير .. وماشيين يدلعوا .. وبعد الزواج تلاقيه سابقها عشرة متر وهى بتجرى وراه .. وهو يقول لها خفى شوية يا تقيلة .. يا بااااااااااااى دا انتى يومك بسنة .. على اللى عاد يخرج معاكى تانى .. انا كان مالى ومال الجوازة الهباب دى ما انا كنت قاعد جنب أمى !!! ..

ويا سلام لو هيخرجوا بالسيارة فى فترة الخطوبة .. تلاقيه يجرى يفتح لها باب السيارة عشان يركبها .. اتفضلى يا حياتى .. ويقفل الباب بحنية .. ولما يسوق وهى مش عارفة تفتح الزجاج تلاقيه يميل عليها ويقول لها ما تتعبيش نفسك يا حياتى انا هفتحهولك .. ويفتح لها الزجاج بكل حنية .. يا عينى .. وبعد الجواز تيجى تقول له مش عارفة أفتح الزجاج يقول لها اكسرى أمه .. ولعى فى أم العربية كلها باللى فيها .. وانا مالى عارفة تفتحيه ولما مش عارفة .. أنا ايه اللى كان رمانى الرمية الطين دى ؟؟ .. ما تنزلى تاخدى تاكس وتريحينى يا شيخة ..

ويا عينى لما يكونوا خارجين فى فترة الخطوبة عشان يسترى لها فستان ولا حاجة .. تلاقيه يفرجها على جميع المحلات .. إيه رأيك فى الفستان دا يا حبيبى .. يجنن يا حياتى .. عليكى هيبقى روعة .. انتى لو تحبى اشتريلك الفستان والمحل كله يا عمرى .. وبعد الجواز يخرجوا يتمشوا شوية وتلاقى المدام وقفت أدام محل تتفرج على فستان .. تلاقى صاحبنا عمال يبص فى السما شوية .. وفى الساعة شوية .. ومدينها طناش خالص .. تقول له ايه رأيك فى الفستان دا .. يقول لها لو عجبك هجيبك كل يوم تتفرجى عليه هنا .. بس يلا .. يلا يا حجة .. حجة .. يلا انتى هتنامى جنب المحل ولا ايه ؟؟ .. عايزين نروح العيال مع أمك .. يلا دى كانت خروجة ما يعلم بها الا ربنا ..

:))))


تعالى بقى نتفرج عالست .. ونشوف سلوكها قبل وبعد ..

فى الخطوبة .. تلاقيها فى اليوم اللى خطيبها جاى فيه من صباحية ربنا تسيب كل حاجة فى البيت وشغل البيت وتعد أدام المرايا .. تحط شوية بكر ( ماهو دا اللى جاب لنا جنون البكر :)) قصدى البقر ) .. شوية آى لينر وتضرب شعرها فى الخلاط وتبقى على سنجة عشرة .. ولما حماده يجى تعد تفشر عليه شويه وتدلع عليه شويه .. والله يا حماده طول الليل بنجيب فى سيرتك أنا وماما .. والله يا حماده دى ماما بتحبك موت .. مش عشان الفاكهة اللى انت بتجيبها معاك وانت جاى .. لأ .. ولما يجى حماده يمشى تعد تودع فى أهله ساعة على باب الشقة .. زى ما يكون حماده رايح ومش راجع تانى .. وبعد الجواز يا عينى عليه .. بيشوف واحدة تانية خالص غير صاحبتنا بتاعة الخطوبة .. ريحة البصل والطبيخ .. هو قميص واحد ما بتغيروش لما بقى عامل زى برميل المخلل الحامض .. ناكشة شعرها .. ماسكة له السكينة .. وأول ما يدخل من عالباب يلاقى دراكولا فى استقباله بالسكينة وتقول له يا ما جاب الغراب لأمه يا خويا .. داخل ايد ورا وايد أدام ؟؟ .. لا وكله كوم وربطة الايشارب كوم تانى خالص .. وتتفنن فى ربطة الايشارب .. شوية تخلى الربطة من أدام وشوية تخليها عالجنب وشوية تخليها ورا .. لما تيجى تصحى جوزها بعد اسبوع من الجواز تقول له قوم يا حبيبى .. وبعد شهر انت لسه نايم ؟؟ قوم قامت قيامتك .. وبعد سنة انت لسه عايش ؟؟ ..

:))

طبعا لو أعدت أحكى عن الستات واللى بيعملوه فى البيوت وأد ايه أزواجهم مساكين مغلوبين على أمرهم مش هخلص النهاردة ..

يا عينى علينا يا رجالة .. مساكين والله ..

الست دى بتكون عاملة زى البطيخة .. يا اما بعد الجواز تطلع حمرا أو أرعة .. انت ونصيبك بقى .. بس فى الغالب بتطلع أرعة ..

ربنا يسترها عليا ..

:))))

بحرينية و فتخر
15-07-2006, 01:06 PM
تسلم اخوي على هذا الموضوع الرائع..
وبالتوفيق للجميع ان شاءالله...

محبة المصطفى
15-07-2006, 06:52 PM
شكرا على الموضوع ولاتغلط على الستات لو سمحت

المشاكس
15-07-2006, 09:24 PM
شكرا لكم جميعا ..

ومافيش غلط ولا حاجة ..

الموضوع فكاهة يعنى من الدرجة الأولى ..

تحياتى لكم جميعا ..

..

**بنت فلة**
23-07-2006, 01:32 AM
ايه صح بالذات السعوديين قبل الزواج شي وبعده شي ثاني

toka
23-07-2006, 12:53 PM
يسلمووو مشاككيس على الموضوع والجهدددددددددددددد الكبير